Published By : Patel Shital

• ભાજપના ઉમેદવારોએ નામ પાછું લીધું અને આપના ઉમેદવાર દિલ્હીના મેયર અને ડે. મેયર બન્યા…

રાજકારણમાં બધુ જ શક્ય છે જેમ કે દિલ્હીના મેયરની ચૂંટણીમાં ભાજપના ઉમેદવારે નામ પાછું ખેચી લેતા આમ આદમી પાર્ટીના ઉમેદવાર બિનહરીફ દિલ્હીના મેયર અને ડે. મેયર જાહેર કરવામાં આવ્યા…

ગત વખતે રાજધાની દિલ્હીના મેયર અને ડેપ્યુટી મેયરની ચૂંટણીમાં જે પ્રકારનો હંગામો થયો હતો, તે પ્રકારનો હંગામો આ વખતે ગૃહમાં જોવા મળ્યો નથી. મેયર અને ડેપ્યુટી મેયરની ચૂંટણી શાંતિપૂર્ણ રીતે સંપન્ન થઈ હતી. દિલ્હીમાં મેયરની ચૂંટણી દરમિયાન ભારતીય જનતા પાર્ટીના ઉમેદવાર શિખા રાયે પોતાનું નામ પાછું ખેંચી લીધું હતું. આ સાથે આમ આદમી પાર્ટીના શૈલી ઓબેરોય બિનહરીફ દિલ્હીના મેયર જાહેર કરવામાં આવ્યા. આજે બુધવારે મેયરની ચૂંટણીની પ્રક્રિયા શરૂ થયાની થોડી જ મિનિટોમાં ભાજપે મેયર અને ડેપ્યુટી મેયર બંનેની ઉમેદવારી પાછી ખેંચી લીધી હતી. ભાજપના ઉમેદવારનું નામ પાછું ખેંચ્યા બાદ પ્રિસાઇડિંગ ઓફિસર મુકેશ ગોયલે ડો. શૈલી ઓબેરોયને મેયર તરીકે જાહેર કર્યા હતા.  ભાજપના મેયર પદના ઉમેદવાર શિખા રાયે પોતે જાહેરાત કરી હતી કે તે પોતાનું નામ પાછું ખેંચી રહી છે. આ સાથે તેમણે કહ્યું કે સ્ટેન્ડિંગ કમિટીની ચૂંટણીની મંજૂરી આપવી જોઈએ. તેમાં કાયદાકીય અવરોધો ન મૂકશો. વાસ્તવમાં સ્થાયી સમિતિનો મામલો દિલ્હી હાઈકોર્ટમાં પેન્ડિંગ છે.

સાથે જ ઉમેદવારી પાછી ખેંચતા ભાજપના શિખા રાયે કહ્યું કે મેં સૌથી મોટી પાર્ટી વતી ઉમેદવાર તરીકે ઉમેદવારી નોંધાવી હતી. પરંતુ અમારી પાર્ટીનો ઉદ્દેશ્ય એ નથી કે માત્ર સત્તા જોઈએ છે. ગત દિવસોમાં  અપેક્ષા હતી કે સ્ટેન્ડિંગ કમિટીની ચૂંટણી પણ થશે, પરંતુ આ મામલો કોર્ટમાં પેન્ડિંગ છે અને તેમાં તારીખ પછી તારીખો લેવામાં આવી રહી છે. આથી જ્યાં સુધી બાકીની બંધારણીય પ્રક્રિયા પૂર્ણ ન થાય ત્યાં સુધી સમિતિની રચના કરવામાં આવે તેવી માંગણી સાથે હું મારું નામ પાછું ખેંચું છું. મેયર બાદ ભાજપના ડેપ્યુટી મેયરના ઉમેદવાર સોની પાંડેએ પણ પોતાનું નામ પાછું ખેંચી લીધું હતું અને આમ આદમી પાર્ટીના ડેપ્યુટી મેયર પણ બિનહરીફ ચૂંટાયા હતા. મેયર શૈલી ઓબેરોયે આમ આદમી પાર્ટીના ડેપ્યુટી મેયરના ઉમેદવાર આલે મોહમ્મદ ઈકબાલને ડેપ્યુટી મેયર તરીકે બિનહરીફ જાહેર કર્યા હતા.