હિમાચલ પ્રદેશને આજે નવા મુખ્યપ્રધાન મળશે. કોંગ્રેસ વિધાનસભા પક્ષની મળેલી બેઠકમાં મુખ્ય પ્રધાન પદ માટે સુખવિંદર સિંહ સુખુના નામને મંજૂરી આપવામાં આવી છે. સુખવિંદર સિંહ સુખુ હિમાચલપ્રદેશના મુખ્યપ્રધાન પદ આજે શપથ ગ્રહણ કરશે. આ પ્રસંગે કોંગ્રેસના રાષ્ટ્રીય અધ્યક્ષ મલ્લિકાર્જુન ખડગે ઉપરાંત રાહુલ ગાંધી અને પ્રિયંકા વાડ્રા પણ શિમલા પહોંચી રહ્યા છે. શપથ ગ્રહણમાં હાજરી આપવા માટે રાહુલ ગાંધી તેમની ભારત જોડો યાત્રા અધવચ્ચે છોડી રહ્યા છે. અત્રે ઉલ્લેખનીય છે કે હિમાચલ પ્રદેશ વિધાનસભાની ચૂંટણીમાં 40 બેઠક જીત્યા બાદ પણ, કોંગ્રેસને હિમાચલ પ્રદેશમાં આગામી સરકાર રચવા માટે સંઘર્ષ કરવો પડ્યો હતો. કારણ કે હિમાચલપ્રદેશના મુખ્ય પ્રધાન કોણ બને તે મુદ્દે બે જૂથમાં ખેંચતાણ સર્જાઈ હતી.

ગઈકાલ શનિવારે કોંગ્રેસ વિધાનસભા પક્ષની બેઠકમાં સુખવિંદર સિંહ સુખુને મુખ્ય પ્રધાન બનાવવાનો નિર્ણય લેવામાં આવ્યો ત્યારે ચિત્ર સ્પષ્ટ થયું. તેમજ નક્કી કરવામાં આવ્યું હતું કે રાજ્યમાં પ્રથમ વખત મુકેશ અગ્નિહોત્રીને હિમાચાલ પ્રદેશના ડેપ્યુટી સીએમ બનાવવામાં આવશે. પાર્ટીના પ્રદેશ અધ્યક્ષ પ્રતિભા સિંહ પણ મુખ્યપ્રધાન પદની રેસમાં હતા, પરંતુ હવે પ્રતિભા સિંહ કહેવું છે કે તેઓ પાર્ટી નેતૃત્વ અને વિધાનસભા પક્ષના નિર્ણયથી સંતુષ્ટ છે અને બધા હિમાચલ પ્રદેશના લોકો માટે સાથે મળીને કામ કરશે.