ગુજરાત વિધાનસભાની ચૂંટણીમાં બોરસદ બેઠક પર ભાજપે મોટો અપસેટ સર્જ્યો છે. આઝાદીના 75 વર્ષ બાદ ભાજપે બોરસદ બેઠક પર જીત મેળવી છે. ભાજપના ઉમેદવાર રમણભાઈ સોલંકીએ કોંગ્રેસના ઉમેદવાર મનીષ પટેલ અને આપના ઉમેદવાર રાજેન્દ્રસિંહ પરમારને હરાવ્યા છે. બોરસદ વિધાનસભા બેઠક કોંગ્રેસનો અભેદ્ય કિલ્લો કહેવાતો હતો, જોકે હવે 2022માં આ બેઠક પર ભગવો લહેરાયો છે. આ બેઠક પર 2017માં કોંગ્રેસના ઉમેદવાર રાજેન્દ્રસિંહ પરમારની જીત થઈ હતી. 2012ની વિધાનસભા ચૂંટણીમાં પણ રાજેન્દ્રસિંહ પરમારે ભાજપ ઉમેદવાર રમણભાઈ સોલંકીને હાર આપી હતી. તો 1995થી 2002 એટલે કે, સતત 3 ટર્મ સુધી ભરતભાઈ સોલંકીએ બોરસદ બેઠક પરથી જીત મેળવી હતી.

રાજ્યમાં સૌથી વધુ વિધાનસભા બેઠકો જીતવાનો રેકોર્ડ માધવસિંહ સોલંકીના નામે છે. માધવસિંહ સોલંકી રાજ્યના 7માં CM હતા. અત્યાર સુધી સૌથી વધુ 182 વિધાનસભા બેઠકોમાંથી 149 બેઠકો જીતવાનો રેકોર્ડ માધવસિંહના નામે હતો, જોકે આ વખતે આ રેકોર્ડ રાજ્યના મુખ્યમંત્રી ભુપેન્દ્ર પટેલે તોડ્યો છે. 2022ની વિધાનસભા બેઠકમાં ભાજપે 182 બેઠકોમાંથી 157 બેઠકો જીતી નવો રેકોર્ડ પ્રસ્થાપિત કર્યો છે. માધવસિંહ વર્ષ 1976માં રાજ્યના CM બન્યા હતા. ત્યારબાદ કોંગ્રેસના નેતા તરીકે તેઓ ચાર વખત CM બન્યા હતા. 1985ની વિધાનસભા ચૂંટણીમાં કોંગ્રેસને રેકોર્ડ સૌથી વધુ બેઠક જીતાવડવાનો શ્રેય માધવસિંહ સોલંકીને જાય છે. તેમણે 1985માં કોંગ્રેસને 149 બેઠકો જીતાડી હતી. આમ 1985થી અત્યાર સુધી આ રેકોર્ડ અકબંધ રહ્યો હતો અને આ વખતે ભાજપે આ રેકોર્ડ તોડ્યો છે.