Published by : Vanshika Gor

સુરતના આકાશમાંથી હાલ કાળઝાળ ગરમી પડી રહી છે સુરતમાં આવી આકરી ગરમી છતાં માત્ર શિયાળામાં જ સુરત આવતાં અનેક વિદેશી પક્ષીઓ માંથી કેટલાક પક્ષીઓના ધામા આટલી ગરમી છતાં પણ સુરતમાં જ હોવાથી પક્ષીપ્રેમીઓ આશ્ચર્ય થઈ રહ્યું છે. સુરતમાં શિયાળામાં આવતા વિદેશી પક્ષીઓને સુરતી ફુડ હેબીટ થઈ ગઈ હોવાથી આ પક્ષીઓ સુરતમાં હજી પણ હોવાનું કહેવાય રહ્યું છે.

શિયાળાની શરૂઆત સાથે જ સુરત સહિત દક્ષિણ ગુજરાતમાં ઓસ્ટ્રેલિયા, યુરોપ, અમેરિકા,સાઈબીરિયા સહિત અનેક દેશના પક્ષીઓ આવીને વસવાટ કરે છે, ઠંડા પ્રદેશમાં શિયાળામાં પાણી પણ બરફ થઈ જાય તેવી સ્થિતિ હોવાથી આવા દેશના પક્ષીઓ ભારતમાં અને ખાસ કરીને સુરત અને દક્ષિણ ગુજરાતમાં નદી અને તળાવના કિનારે આવી જાય છે.

સુરતના તાપી નદીના કિનારાઓ, કોઝવે, ગવિયર તળાવ કિનારો, બરબોધન અને ઓલપાડ, હાંસોટ સહિતના અનેક જગ્યાએ આવેલા તળાવ અને ખાડી કિનારે હજારો સંખ્યામાં વિદેશી પક્ષીઓ શિયાળા દરમિયાન મહેમાન બને છે જેના કારણે બર્ડ વોચર્સ જલ્સો થઈ જાય છે. પરંતુ શિયાળો પૂરો થતાં હજારો માઈલ દૂર આ પક્ષી પોતાના વતન જતા રહે છે.