• જિલ્લા વિકાસ અધિકારી પી આર જોષીની ઉપસ્થિતિમાં સમગ્ર કાર્યક્રમનું રિહર્સલ અને નિદર્શન યોજાયું

ભરૂચ જિલ્લામાં રાષ્ટ્રીય પર્વ પ્રજાસત્તાક દિવસની જિલ્લાકક્ષાની ઉજવણીનું કાઉન્ટ ડાઉન શરૂ થઈ ગયું છે. આજરોજ જિલ્લા વિકાસ અધિકારી પી આર જોષીની વિશેષ ઉપસ્થિતિમાં ભરૂચના હોસ્ટેલ ગ્રાઉન્ડ ખાતે સમગ્ર કાર્યક્રમનું
રિહર્સલ અને નિદર્શન યોજાયું હતું. જેમાં પોલીસ અધિક્ષક ડૉ લીના પાટીલ સહિતના ઉચ્ચ અધિકારીઓ, પોલીસ દળના જવાનો ઉપસ્થિત રહ્યાં હતાં. જેમાં પોલીસ જવાનો દ્વારા વિવિધ કરતબો, પરેડ, અશ્વ શો તેમજ ડોગ શો, તેમજ શહેરની વિવિધ શાળાઓના સાંસ્કૃતિક કાર્યક્રમ સહિતના અવસરોના રિહર્સલનું જિલ્લા વિકાસ અધિકારી પી આર જોષીએ બારીકાઈથી નિરીક્ષણ કર્યું હતું. તેમજ સંલગ્ન અધિકારીશ્રીઓને માર્ગદર્શિત કર્યાં હતા.

આ રિહર્સલ તથા નિદર્શનમાં નિવાસી અધિક કલેકટર એન આર ધાધલ, પ્રાંત અધિકારી યુ એન જાડેજા,અમલીકરણ વિભાગના અધિકારીશ્રીઓ તથા મોટી સંખ્યામાં નગરજનો ઉપસ્થિત રહ્યા હતા.