Published by : Vanshika Gor

લોકસભા ચૂંટણી 2024 પહેલા વિપક્ષી દળોને એકજૂટ કરવાના ઉદ્દેશ્ય સાથે બિહારના મુખ્યમંત્રી નીતિશ કુમાર આજે બપોરે બંગાળના મુખ્યમંત્રી મમતા બેનરજી સાથે મુલાકાત કરવા કોલકાતા આવી રહ્યા છે. સૂત્રોના જણાવ્યા અનુસાર નીતીશ કુમાર બપોરે એક ખાસ વિમાન દ્વારા કોલકાતા આવશે અને મમતા બેનરજીને મળશે. આ કાર્યક્રમ હેઠળ નીતીશ કોલકાતામાં ત્રણ-ચાર કલાક રોકાયા બાદ સોમવારે જ લખનઉ રવાના થશે અને પછી સમાજવાદી પાર્ટીના વડા અખિલેશ યાદવ સાથે બેઠક કરશે. અગાઉ આ જ રીતે કેસીઆર અને સ્ટાલિન પણ અગાઉ વિપક્ષને એકજૂટ કરવાના પ્રયાસો કરી ચૂક્યા છે.

તૃણમૂલ કોંગ્રેસના વરિષ્ઠ નેતાના જણાવ્યા અનુસાર, આ બેઠકમાં 2024ની લોકસભા ચૂંટણીમાં વિપક્ષી એકતા અંગે ચર્ચા કરવામાં આવશે. ઉલ્લેખનીય છે કે, છેલ્લા કેટલાક મહિનામાં મમતા બેનરજીએ વિપક્ષી એકતા અંગે ઘણા બિન-ભાજપ અને બિન-કોંગ્રેસી નેતાઓ સાથે બેઠકો કરી છે. નીતીશ ત્રણથી ચાર કલાક કોલકાતામાં રોકાશે તેવી ચર્ચા છે, જેમાં તેમના બંગાળ સમકક્ષ સાથે દોઢ કે બે કલાકની બેઠકનો સમાવેશ થાય છે. નીતિશ કુમાર અગાઉ મંગળવારે સવારે કોલકાતા પહોંચવાના હતા અને તે જ સાંજે દક્ષિણ કોલકાતામાં તેમના કાલીઘાટ નિવાસસ્થાને મમતાને મળવાના હતા. જો કે હવે કાર્યક્રમમાં ફેરફાર કરવામાં આવ્યો છે અને નીતિશ સોમવારે જ આવી રહ્યા છે.

એવી પણ માહિતી મળી છે કે મમતા સાથે મુલાકાત કર્યા બાદ નીતિશ કુમાર સીધા અખિલેશ યાદવને મળવા લખનઉ જશે. ગત મહિને સમાજવાદી પાર્ટીના વડા અખિલેશ યાદવે કોલકાતાના કાલીઘાટમાં મમતા સાથે મુલાકાત કરી હતી. બેઠકમાં બંને નેતાઓ કોંગ્રેસથી અંતર રાખવા અને 2024ની ચૂંટણીમાં ભાજપ વિરુદ્ધ પ્રાદેશિક પક્ષોની એકતા પર ધ્યાન કેન્દ્રિત કરવા સંમત થયા હતા.