Published by : Vanshika Gor

• ભરૂચ જિલ્લામાં ફૂટબોલથી 37 વર્ષીય વિશાખા ભાલે વિધાર્થીનીઓનું શાળા છોડવાનુ પ્રમાણ ઘટાડ્યું
• મહિલા કોચ સ્થાનિક છોકરીઓને રાજ્ય સંચાલિત શાળામાં જવા માટે પ્રોત્સાહિત કરવા માટે સોકરનો ઉપયોગ કરે છે
• આજે જિલ્લાની 24 મહિલાઓ બેઝિક કોર્સ સાથે ઈ લાઇસન્સ લઈ ફૂટબોલ કોચ બની
• પ્રોજેક્ટની મદદથી જંબુસર, આમોદ, નેત્રંગ અને વાલિયાના બાળકોને શાળાએ પાછા લાવવામાં સફળ રહ્યા

ફૂટબોલ – ભરૂચ જિલ્લામાં રાજ્ય સંચાલિત શાળાઓમાં ભણતી વિદ્યાર્થિનીઓમાં ડ્રોપઆઉટ રેટ ઘટાડવામાં ભાગ ભજવી રહ્યો છે. આ જાણીને તમને નવાઈ લાગી હશે, પરંતુ આ સત્ય છે.એક 37 વર્ષીય મહિલા શાળા છોડવાના દરને સુધારવા માટે ફૂટબોલનો ઉપયોગ કરે છે અને સાથે સાથે ગામની છોકરીઓને સશક્ત બનાવે છે. છોકરીઓને શિક્ષણ મેળવવા માટે પ્રોત્સાહિત કરે છે. એક મહિલાએ લાયકાત ધરાવતા મહિલાઓની કોચ બ્રિગેડ ઉભી કરી હવે છોકરીઓને ફૂટબોલ કેવી રીતે રમવું તે શીખવી રહી છે. સાથે જ તેમને શાળામાં જવા અને શૈક્ષણિક કાર્યોને આગળ વધારવા માટે પ્રોત્સાહિત કરી રહી છે.

જંબુસર અને ભરૂચ જિલ્લાના અન્ય જિલ્લાઓમાં 37 વર્ષીય વિશાખા ભાલે સ્થાનિક છોકરીઓને શાળામાં પાછા ફરવા માટે પ્રોત્સાહિત કરવા માટે ફૂટબોલનો એક શક્તિશાળી હથિયાર તરીકે ઉપયોગ કરી રહી છે. તેણીએ ડ્રોપઆઉટ રેટ ઘટાડ્યો છે, પોતે એક ફૂટબોલ ખેલાડી હોવાને કારણે રમતનો ઉપયોગ કરીને શાળાની વિદ્યાર્થિનીઓને વર્ગખંડમાં પાછા ફરવામાં અસરકારક રીતે ટેકો આપ્યો છે.આ યુવતીઓએ રાજ્યકક્ષાએ ફૂટબોલ સ્પર્ધામાં ભાગ લઈ જિલ્લાને ગૌરવ અપાવ્યું હતું. ગામડાઓની મહિલાઓ પણ પોતાના ઘર છોડીને પોતાને સ્થાપિત કરવામાં સફળ થઈ રહી છે.

વર્ષ 2017 માં વિશાખા ભાલે જંબુસર સ્થિત નંદી ફાઉન્ડેશનમાં પ્રોગ્રામ આસિસ્ટન્ટ તરીકે જોડાયા હતા. તેઓ કૃષિ, ખેડૂતો, શિક્ષણ, યુવાનોના ક્ષેત્રમાં કામ કરે છે. તેમનો એક કાર્યક્રમ નન્હી કલી છે જે શાળામાં જતી છોકરીઓના શિક્ષણ માટે સક્રિય છે. સરકારી શાળાઓમાં 1 થી 10મા ધોરણ સુધી ભણતી છોકરીઓ પર ધ્યાન કેન્દ્રિત કરે છે, અને તેમના ડ્રોપઆઉટ રેશિયોને ઘટાડવાનો પ્રયાસ કરે છે.

આ મહિલાએ સ્થાનિક છોકરીઓને ફૂટબોલની રમત સાથે જોડતા સારા પરિણામ મળવા લાગ્યા. પરંતુ વધુ સારા કોચ મેળવવામાં સમસ્યા હતી અને પછી ગ્રામીણ તાલીમ આપી. મહિલાઓ, જેઓ પ્રથમ વખત તેમના ઘરની બહાર આવી અને તેમની પુત્રીઓને તાલીમ આપવા માટે રમતગમતમાં જોડાઈ. આજે 24 મહિલાઓએ બેઝિક કોર્સ સાથે ઈ લાઇસન્સ લીધું છે જે ઓલ ઈન્ડિયા ફૂટબોલ ફેડરેશનની વેબસાઈટ પર પણ જોઈ શકાય છે. તેઓએ ગયા સપ્ટેમ્બરમાં આ લાઇસન્સ મેળવ્યું હતું અને હવે ડી લાયસન્સ પરીક્ષા આપવા જઈ રહ્યા છે.

ફૂટબોલ ગોલ પ્રોજેક્ટની મદદથી તેઓ જંબુસર, આમોદ, નેત્રંગ અને વાલિયાના બાળકોને શાળાએ પાછા લાવવામાં સફળ રહ્યા છે. વિશાખા ભાલે જંબુસર આવ્યા ત્યારે જોયું કે છોકરીઓ શાળાએ આવતી નથી, તેમની હાજરી સારી નથી, પોષણનું સ્તર પણ ઓછું છે. પૂછવા પર તેઓએ ખો-ખો અને કબડ્ડી જેવી રમતો રમવાનું કહ્યું. આને ધ્યાનમાં રાખીને ફૂટબોલને રમત તરીકે રજૂ કર્યું અને તે કુલ ફિટનેસ સાથે તેમના ભણતરમાં સુધારો કરવામાં મદદ કરી. ઇતિહાસમાં પ્રથમ વખત, ગ્રામીણ વિસ્તારની આ મહિલાઓને રાજ્ય કક્ષાએ માન્યતા મળી અને છોકરીઓ તેમના જિલ્લાનું પ્રતિનિધિત્વ કરતી અંડર 17 ફૂટબોલ ટુર્નામેન્ટમાં રમી. રાષ્ટ્રીય કક્ષાએ ગુજરાતની ટીમનું પ્રતિનિધિત્વ કરતા ભાલેએ જણાવ્યું હતું.

આજે 5000 છોકરીઓ ફૂટબોલ કોચ વિશાખા ભાલે સાથે સક્રિય છે અને ગામડાની મહિલાઓ સમાજના બંધનમાંથી બહાર આવીને તેમના સપના પૂરા કરી રહી છે. વર્ષ 2018 માં 2 શાળાના બાળકો સાથે શરૂઆત કરી હતી અને આજે સંખ્યામાં વધારો થયો છે. છોકરીઓ શાળામાં પાછી ફરી છે.ગુજરાત સરકારે પણ આ મહિલા કોચને ટેકો આપ્યો છે. તેઓ શાળાઓના મેદાન અને વર્ગખંડોનો ઉપયોગ કરીને સ્પર્ધાઓનું આયોજન કરે છે. હવે ભારતના અન્ય રાજ્યો અને ગુજરાતમાં દાહોદ, ડાંગ, નર્મદા, સાબરકાંઠા, બનાસકાંઠા જેવા સ્થળોએ ફૂટબોલ ગોલ પ્રોજેકટ શરૂ કરવાનું વિચારી રહ્યા છીએ. તેઓના મુખ્ય કોચ લિસા મુરાવસ્કી જે બેલ્જિયમથી છે તે વર્ષમાં એકવાર અહીં આવે છે અને બાળકો અને મહિલાઓને તાલીમ આપે છે. આ ઉપરાંત, તે આખા વર્ષ દરમિયાન સંપર્કમાં રહે છે અને માર્ગદર્શન આપે છે.

મહિલા કોચ ભાલે રમત માટે તેઓ ફૂટબોલ સ્પર્ધાઓનું આયોજન કરવા અને કોચિંગ માટે પાઈપો અને નેટનો ઉપયોગ કરીને જાતે ગોલ પોસ્ટ પણ બનાવતા હતા. તેઓ જંબુસર અને આમોદની 24 મહિલાઓને પ્રોફેશનલ કોચ બનવા માટે તાલીમ આપી છે અને તેઓ હવે તેમની છોકરીઓને તાલીમ આપી રહ્યા છે.ઝારખંડ અને બિહારના નક્સલવાદી વિસ્તારોમાં આદિવાસી બાળકો સાથે ભાલે કામ કરતા હતા, ત્યારે તેમની ઝડપ વધારવા અને તેમને શારીરિક રીતે મજબૂત બનાવવા માટે ત્યાં પણ ફૂટબોલ પ્રોજેકટ કર્યું હતું. લગ્ન પછી તેઓ ગુજરાતમાં આવ્યા અને આ જ ફૂટબોલ પ્રોજેક્ટને ભરૂચ જિલ્લામાં અમલમાં મૂક્યો. નનહી કલી પ્રોજેક્ટ અને ડ્રોપઆઉટ રેશિયોમાં સુધારો કરવામાં સફળ રહ્યો. મૂળભૂત રીતે મધ્ય પ્રદેશના પન્નાની વિશાખા કોલેજના સમયથી ફૂટબોલ રમે છે.