Published By : Disha PJB

ગત વર્ષે 06/05/2022 ના રોજ ચલણી નોટો બનાવવાના ગુન્હામાં મૂળ વડોદરાના આરોપી અનિલ ઉર્ફે એન્થોની મુલચંદ ગંગવાણીની છોટા ઉદેપુરના પાનવડ પોલીસ દ્વારા ધરપકડ કરવામાં આવી હતી. જેની તબિયત લથડતાં વડોદરાની હોસ્પિટલમાં ખસેડવામાં આવ્યો હતો જ્યાંથી તે છટકું ગોઠવી ફરાર થઈ ગયો હતો.

વડોદરા પોલીસે અનિલ ઉર્ફે એન્થોની અને તેને ફરાર થવામાં મદદ કરનાર સામે ગુન્હો દાખલ કર્યો હતો તથા તેને શોધી કાઢનાર માટે રૂપિયા 25 હજારના ઇનામની પણ ઘોષણા કરવામાં આવી હતી.

ACP એચ. એ. રાઠોડ અને અન્ય પોલીસ અધિકારીઓએ અનિલ ઉર્ફે એન્થોનીને શોધી કાઢવા સઘન કવાયત હાથ ધરી હતી, દરમ્યાન બાતમી મળી હતી કે ફરાર આરોપી અનિલ ઉર્ફે એન્થોની વડોદરાના હાઈ વે બાજુથી ખોડીયાર નગર તરફ આવનાર છે. જેથી પોલીસે વોચ ગોઠવી હતી. પોલીસને જોઈ ભાગવાનો પ્રયાસ કરતા આરોપીને પોલીસની ટીમે દબોચી લીધો હતો.

ધરપકડ થયેલ આરોપીની તપાસ કરતા તેની અંગજડતી માંથી 2 લોડેડ પિસ્તોલ 6 જીવતા કારતૂસ અને બે મોબાઇલ ફોન મળી આવ્યા હતા. કુલ 63,700 નો મુદ્દામાલ કબ્જે કરી ક્રાઇમ બ્રાન્ચ દ્વારા તપાસ હાથ ધરવામાં આવી હતી.

ઝડપાયેલ આરોપી અનિલ ઉર્ફે એન્થોની આણંદ ખાતેના ખૂનકેસ ઉપરાંત, દાહોદ , ભરૂચ , છોટા ઉદેપુર , જામનગર , વડોદરા, ખેડા , મોરબીના જુદા જુદા પોલીસ સ્ટેશનમાં કુલ 41 ગુન્હાનો ગુનાહિત ઇતિહાસ ધરાવે છે.