Published by : Rana Kajal
ભારતીય તબીબો માટે કેનેડા જવાનો માર્ગ વધુ મોકળો થયો છે. કેનેડા સરકારે તબીબો માટે ખાસ છૂટછાટો આપતા ભારતીય તબીબો માટે કેનેડા જવું અને સ્થાયી થવું વધુ સરળ બનશે. જૉકે હાલમા પણ કેનેડામાં દર 10 તબીબોમાં 1 તબીબ ભારતીય છે.
કેનેડા સરકાર તેમના દેશમાં વિદેશી ડૉક્ટરોની એન્ટ્રી વધુ સરળ કરવા જઇ રહી છે. કેનેડા સરકારે વિદેશી પોસ્ટ ગ્રેજ્યુએટ્સ ડૉક્ટરોની પ્રેક્ટિસ અને લાઇસન્સ આપવાની પ્રક્રિયાના નિયમોમાં ફેરફારનો ડ્રાફ્ટ તૈયાર કર્યો છે. કેનેડામાં વિદેશી સ્પેશિયાલિસ્ટ ડૉક્ટરો માટે પ્રેક્ટિસનો સાત વર્ષનો અનુભવ ઘટાડીને બે વર્ષ કરી દેવાયો છે. તે સાથે લાઇસન્સ આપવાની પ્રક્રિયા પણ પાંચ વર્ષથી ઘટાડીને ત્રણ વર્ષ કરવાનો પ્રસ્તાવ છે. તેનાથી સૌથી વધુ ફાયદો કેનેડામાં પ્રેક્ટિસ કરવા ઇચ્છુક ભારતીય ડૉક્ટરોને થશે. એમ મનાઇ રહ્યું છે.કેનેડિયન એસોસિયેશન ઓફ ફિઝિશિયન્સ ઓફ ઇન્ડિયન હેરિટેજના મતે, કેનેડામાં હાલ આઠ હજારથી વધુ ભારતીય ડૉક્ટર કાર્યરત છે. એક અનુમાન પ્રમાણે, કેનેડામાં દર દસમાંથી એક ડૉક્ટર ભારતીય છે. કેનેડામાં સ્પેશિયાલિસ્ટ ડૉક્ટરોની અછત છે.
કેનેડામાં ડૉક્ટરોની અછતનું મોટું કારણ એ છે કે મેડિકલ કોલેજોમાં ઓછી બેઠકો હોવાથી તબીબોની સંખ્યા ઓછી છે. કેનેડાના દર વર્ષે 3500 વિદ્યાર્થી મેડિકલનો અભ્યાસ કરવા અમેરિકા, બ્રિટન, ઓસ્ટ્રેલિયા કે આયર્લેન્ડ જેવા દેશોમાં જાય છે. જે અભ્યાસ પુર્ણ કર્યા બાદ પરત કેનેડા ફરતા નથી. બહાર મેડિકલનો અભ્યાસ કરનારા વિદ્યાર્થીઓને કેનેડામાં પ્રેક્ટિસ કરવા સાત વર્ષના અનુભવની જરૂર હોય છે. તેથી મોટા ભાગના પાછા જ નથી આવતા અને બીજા દેશોમાં જ પ્રેક્ટિસ શરૂ કરી દે છે.
તેમજ કેનેડામાં સરળતાથી પરમેનેન્ટ રેસિડન્સી નથી મળતી. તેના માટે અરજી કરવાથી ત્રણ વર્ષનો અનુભવ અને આશરે એક વર્ષનો સ્કિલ્ડ વર્ક અનુભવ માંગવામાં આવે છે. એટલે અરજી કરનારાએ આશરે ચાર વર્ષ રાહ જોવી પડે છે. તેથી વિદેશી ડૉક્ટરોને વેરિફાઇ કરતી સંસ્થા ધ રોયલ કોલેજ ઓફ ફિઝિશિયન એન્ડ સર્જન્સ ઓફ કેનેડા (આરસીપીએસસી)એ પણ તેના સ્ટાફમાં વધારો કર્યો છે. આમ કરીને આરસીપીએસસીમોટી સંખ્યામાં આવતી ડૉક્ટરોની અરજીની સમીક્ષા કરી શકશે. કેનેડામાં વિદેશી ડૉક્ટરોની એન્ટ્રીને ઝડપી અને સરળ બનાવવા આ નિર્ણયો લેવાયા છે.