Published By : Disha PJB

સહકારી ક્ષેત્રની અગ્રગણ્ય અને મલાઈદાર ગણાતી બરોડા ડેરીના પ્રમુખ – ઉપપ્રમુખની ચૂંટણી આજરોજ યોજાનાર હતી. પરંતુ ચૂંટણી અધિકારી જ ન આવતા આ ચૂંટણી મુલતવી રાખવામાં આવી હતી. હવે આગામી 3 જુલાઈના રોજ આ ચૂંટણી યોજવામાં આવશે. મેન્ડેડ ખુલે તે પહેલા જ વિરોધ ભાખી ગયેલા રાજકારણીઓએ ચૂંટણી અધિકારીને જ ન આવવા દીધા તેવો પણ ગણગણાટ જોવા મળી રહ્યો હતો. સવારે 11 કલાકથી ચાલી રહેલ હાઈ પ્રોફાઈલ ડ્રામાનો બપોરે 3.30 કલાકે અંત આવ્યો હતો.

બરોડા ડેરી કે જે અનેકવાર વિવાદોમાં સપડાઈ છે. ક્યારેક ભ્રષ્ટાચારના મામલે તો ક્યારેક સગાવાદના મામલે ડેરી હંમેશા ચર્ચામાં રહી છે. થોડા મહિનાઓ અગાઉ સાવલીના ધારાસભ્ય કેતન ઇનામદાર દ્વારા ઉહાપોહ મચાવવામાં આવ્યો હતો ત્યાર બાદ પ્રમુખે રાજીનામુ આપ્યું અને નવા પ્રમુખ – ઉપપ્રમુખની નિમણુંક કરવામાં આવી હતી. પ્રમુખ તરીકે જિલ્લા ભાજપાના પ્રમુખ સતીશ પટેલ (નિશાળિયા) તથા ઉપ્રમુખ તરીકે કોંગ્રેસ માંથી ભાજપમાં જોડાયેલા ક્રિપાલસિંહ મહારાઉલજી કે જેઓને કેતન ઇનામદારના અંગત માનવામાં આવે છે તેઓની નિમણુંક કરાઈ હતી.

બે મહિના અગાઉ નવા પ્રમુખ – ઉપપ્રમુખ નિમાયા બાદ વિવાદ શાંત થઇ ગયો હતો જો કે આજે આગામી અઢી વર્ષ માટે પ્રમુખ – ઉપપ્રમુખની ચૂંટણીઓ યોજાવાની હતી. સવારે 11 કલાકથી ડેરી ખાતે સભાસદો, ડિરેક્ટરો અને તમામ આગેવાનો આવી ગયા હતા. બપોરે 12 કલાકે જિલ્લાના પ્રભારી રાજુ પાઠક મેન્ડેડ લઈને આવી ગયા હતા. જો કે મેન્ડેડ આવે તે પહેલા જ કેટલાક ડિરેક્ટરોમાં વિરોધનો સુર જોવા મળ્યો હતો.

મેન્ડેડ આવ્યા બાદ સહુ કોઈ ચૂંટણી અધિકારીની રાહ જોઈ રહ્યા હતા. પ્રથમ ચૂંટણી અધિકારીએ 12 કલાકના બદલે 3 કલાકે આવવાની તૈયારી બતાવી તો ત્યાર બાદ 3 વાગે એક પત્ર આવ્યો અને ચૂંટણી અધિકારી આજે હાઇકોર્ટમાં હોઈ તેઓ નહિ આવી શકે અને આગામી ચૂંટણી 3 જુલાઈના રોજ યોજવામાં આવશે તેમ જણાવવામાં આવ્યું. જો કે આ 3 – 4 કલાકમાં ડેરીમાં હાઈ પ્રોફાઈલ ડ્રામા ચાલ્યો હતો. ડેરીમાં જો આજે ચૂંટણી યોજાય તો બળવો સાફ દેખાતો હતો જેના કારણે ચૂંટણી અધિકારીને જ ન આવવા દીધા હોવાનો આક્ષેપ પણ કરવામાં આવ્યા છે.

ઇનપુટ : દિગ્વિજય પાઠક, વડોદરા.