Published by : Vanshika Gor

મેઘાલય અને નાગાલેન્ડમાં 27 ફેબ્રુઆરીએ યોજાનારી ચૂંટણી પહેલા તમામ રાજકીય નેતાઓ મતદારો સુધી પહોંચવાનો પ્રયાસ કરી રહ્યા છે. આ એપિસોડમાં વડાપ્રધાન નરેન્દ્ર મોદી પણ ત્યાં પહોંચી રહ્યા છે. PM મોદી 24 ફેબ્રુઆરીએ શિલોંગ અને તુરામાં પોતાની પાર્ટી માટે પ્રચાર કરવા જઈ રહ્યા છે. જો કે, મેઘાલય સરકારે તુરાના પીએ સંગમા સ્ટેડિયમમાં પીએમ મોદીની રેલી માટે પરવાનગી આપવાનો ઇનકાર કરી દીધો છે.

રાજ્ય સરકારે આપ્યું આ કારણ
મેઘાલય સરકાર હેઠળ આવતા રાજ્યના રમતગમત વિભાગે મુખ્ય પ્રધાન કોનરાડ સંગમાના ગૃહ મતવિસ્તાર દક્ષિણ તુરા ખાતેના સ્ટેડિયમમાં રેલીની મંજૂરી નકારી કાઢી હતી અને કહ્યું હતું કે અહીં બાંધકામનું કામ ચાલી રહ્યું છે અને સુરક્ષાના કારણોસર આ સ્થળને મંજૂરી આપવી યોગ્ય નથી.

અહીં ભારતીય જનતા પાર્ટીએ રેલી માટે જગ્યા ન આપવાને લઈને રાજ્યના શાસક પક્ષ પર આકરા પ્રહારો કર્યા છે. ભાજપે કહ્યું કે નેશનલ પીપલ્સ પાર્ટી (NPP) સરકાર તૃણમૂલ કોંગ્રેસ અને રાજ્યની અન્ય વિપક્ષી પાર્ટીઓ સાથે મળીને ભાજપની લહેરને રોકવા માગે છે અને તેથી આવા પગલાં લઈ રહી છે.

સમાચાર એજન્સી પીટીઆઈ સાથે વાત કરતા, જિલ્લા ચૂંટણી અધિકારી સ્વપ્નિલ ટેમ્બેએ જણાવ્યું હતું કે, “રમત વિભાગે ભાજપને જાણ કરી છે કે સ્ટેડિયમમાં આટલા મોટા મેળાવડાનું આયોજન કરવું યોગ્ય રહેશે નહીં કારણ કે ત્યાં બાંધકામનું કામ હજુ પણ ચાલુ છે.” આવી સ્થિતિમાં, ત્યાં રાખવામાં આવેલ સામાન સુરક્ષાની દ્રષ્ટિએ ખતરનાક બની શકે છે.

ભાજપે સવાલ ઉઠાવ્યા
કેન્દ્રની નરેન્દ્ર મોદી સરકારે આ સ્ટેડિયમના નિર્માણ માટે 90 ટકા નાણાં આપ્યા છે. તેને બનાવવામાં 127 કરોડ રૂપિયાનો ખર્ચ થયો છે. આ સ્ટેડિયમનું ઉદ્ઘાટન ગયા વર્ષે 16 ડિસેમ્બરે જ થયું હતું. જેનું ઉદ્ઘાટન મુખ્યમંત્રી સંગમાએ કર્યું હતું. ભાજપે સવાલ ઉઠાવ્યો છે કે, ઉદ્ઘાટન બાદ પણ રેલી માટે સ્ટેડિયમ ન મળવું એ કહે છે કે વિપક્ષ કયા ઈરાદાથી કામ કરી રહ્યો છે. ભાજપના રાષ્ટ્રીય મહાસચિવ ઋતુરાજ સિંહાએ કહ્યું કે, સ્ટેડિયમના ઉદ્ઘાટનના બે મહિના બાદ સરકાર તેને અધૂરી અને રેલી માટે અનુપલબ્ધ ગણાવે છે, તે આશ્ચર્યજનક છે.