Published By : Disha PJB

સુરત ડુમ્મસ પોલીસ અને ફાયર વિભાગની સરાહનીય કામગીરી સામે આવી છે. 16 વર્ષના ડૂબતા કિશોરને બચાવ્યો છે. કિશોર પોતાના મિત્ર સાથે ડુમ્મસ ચોપાટી ફરવા આવ્યો હતો. બાદમાં ડુમ્મસના દરિયામાં ન્હાવા પડ્યો હતો. ભરતીના પાણીએ કિશોરને દરિયાની અંદર ખેંચી લીધો હતો. જેથી મિત્રએ ગભરાઈને સ્થાનીકોને જાણ કરી હતી. સ્થાનિકોએ પોલીસને જાણ કરતા પેટ્રોલિંગ કરી રહેલી ડુમ્મસ પોલીસ તાત્કાલિક ઘટના સ્થળે પહોંચી હતી અને સાથે ફાયર વિભાગને પણ જાણ કરવામાં આવી હતી. ફાયર વિભાગ ઘટના સ્થળે પહોંચી જવાનો દરિયામાં બે કલાક સુધી કિશોરની શોધખોધ હાથ ધરી હતી અને અંતે કિશોરને શોધી કાઢી બહાર કાઢ્યો હતો. સ્થળ ઉપર હાજર 108 એમ્બયુલેન્સની ટીમે કિશોરને પ્રાથમિક સારવાર આપી હતી. બાદમાં કિશોરને ઘરે મોકલી આપવામાં આવ્યો હતો.

આ બાબતે વેસું ફાયર વિભાગના ઓફિસર પ્રકાશ પટેલે જણાવ્યું હતુંકે, સાંજે 4:41 વાગે ફાયર કંટ્રોલ રૂમથી આ કોલ આપવામાં આવ્યો હતો કે, ડુમ્મસ દરિયા કિનારે એક કિશોર ડૂબી રહ્યો છે. દરિયાના પાણીમાં અર્ધો કિલોમીટર સુધી ખેંચાઈ ગયો છે. જેથી અમે ત્યાં પહોંચીને અમારી ટીમમાં તમામ જવાનો દરિયામાં કિશોરને શોધવા માટે અંદર ગયા હતા. લગભગ બે કલાક સુધી કિશોરની દરિયામાં શોધખોળ હાથધરી હતી. ત્યારબાદ અંતે તે મળી આવતા તેનું સહી સલામત રેસકયુ કરી બહાર લાવવામાં આવ્યો હતો. અને ત્યાંજ તેનું 108 એમ્બ્યુલન્સની ટીમ દ્વારા પ્રાથમિક સારવાર આપી હતી.

વધુમાં જણાવ્યું કે, ફાયર વિભાગને ડુમ્મસ પોલીસ દ્વારા જાણ કરવામાં આવી હતી. આ કિશોર 16 વર્ષનો છે. જેનું નામ વિષ્ણુ ગાડરિયા છે. તેઓ હાલ થોડા દિવસ પહેલા જ પોતાના મૂળ ઉત્તરપ્રદેશના અલીગઢથી સુરતના મગદલ્લા બ્રિજ પાસે આવેલ ગવિયાર ગામ તેની માસી પાસે આવ્યો હતો. અને આજે પોતાના મિત્રો જોડે ડુમ્મસ ચોપાટી ફરવા આવ્યો હતો. ત્યાંથી તેઓ દરિયો જોવા માટે બિચ ઉપર ગયા પરંતુ પાણી જોઈ તેઓ નાહવા માટે અંદર ગયા હતા. પરંતુ દરિયામાં તેઓ ખેંચાઈ જતા તેના મિત્ર દ્વારા સ્થાનીકોને જાણ કરી હતી.

ઇનપુટ : જયેન્દ્ર પાંડે, સુરત.