Published By:-Bhavika Sasiya

• ગ્રાન્ટેડ શાળાના સંચાલકો અને કર્મચારીઓ તેમની પડતર માંગણીઓ ન સંતોશાતાં બ્લેક સપ્તાહ દ્વારા વિરોધ કરશે….

ગુજરાત રાજય શૈક્ષણિક સંઘ સંકલન સમીતી દ્વારા પડતર માંગણીઓને લઈને શરૂ કરેલા આંદોલનની આગળની રણનીતિ જાહેર કરી છે. ગઈકાલે ગાંધીનગર ખાતે મળેલી સંકલન સમીતીની બેઠકમાં આ કાર્યક્રમ અંગે ઠરાવ કરાયો હતો. જેમાં 12 ઓગષ્ટના રોજ તમામ ગ્રાન્ટેડ શાળાના કર્મચારીઓ તાલુકા મથકે પ્લે કાર્ડ સાથે મૌન ધરણા કરશે ત્યારબાદ 17 ઓગષ્ટથી 24 ઓગષ્ટ દરમિયાન બ્લેક સપ્તાહ ઉજવવાનું નકકી કરાયું છે. જેમાં ગ્રાન્ટેડ શાળાના તમામ કર્મચારીઓ અને સંચાલકો એક સપ્તાહ સુધી કાળા કપડા પહેરીને આવશે. ગુજરાત રાજય શૈક્ષણિક સંઘ સંકલન સમીતીની બેઠક મળેલી. આ બેઠકમાં સંકલન સમીતી દ્વારા પડતર પ્રશ્નો મુદે શરૂ કરવામાં આવેલા આંદોલન અંગે ચર્ચા કરવામાં આવી હતી. જેમાં સૌપ્રથમ આંદોલનના ચાર તબકકાના કાર્યક્રમની સમીક્ષા કરવામાં આવી હતી.

સંકલન સમીતી દ્વારા શરૂ કરાયેલા આંદોલનમાં ચાર તબકકા પુર્ણ થયા બાદ હવે આગળની રણનીતિ ઘડવાનું નકકી કરાયું હતું. આંદોલનમાં હજુ પણ શૈક્ષણિક કામગીરી સિવાયની તમામ કામગીરીના બહિષ્કારની બાબતમાં કયાંક ચુક થતી હોવાની નોંધ સંકલન સમીતીની બેઠકમાં લેવામાં આવી હતી અને તેને લઈને પણ ગહન ચર્ચા કરાઈ હતી. સંકલન સમીતી દ્વારા આંદોલનના આગામી તબકકાની રણનીતિ જાહેર કરી હતી અને તેના અસરકારક અમલીકરણ માટે બેઠકમાં સર્વાનુમતે ઠરાવ કરવામાં આવ્યો હતો.

સંકલન સમીતી દ્વારા આંદોલનના આગામી તબકકામાં 12 ઓગષ્ટ એટલે કે શનિવારના રોજ બપોરના 12 વાગ્યાથી લઈને 3 વાગ્યા સુધી દરેક તાલુકા મથકે આવેલા જાહેર સ્થળ પર ગુજરાતની તમામ ગ્રાન્ટેડ માધ્યમિક અને ઉચ્ચતર માધ્યમિક શાળાઓના સંચાલકો, આચાર્યો, શિક્ષકો તથા વહીવટી કર્મચારીઓ પ્લે કાર્ડ સાથે મૌન ધરણા કરશે. ધરણા સ્થળે સંવર્ગ વાઈઝ હાજરી પત્રક નિભાવવામાં આવશે અને તેની કોપી જિલ્લા સંકલન સમીતીએ રાજય સંકલન સમીતીને મોકલવાની રહેશે.ત્યારબાદ છઠ્ઠા તબકકાના કાર્યક્રમમાં આગામી 17 ઓગષ્ટથી લઈને 24 ઓગષ્ટ સુધી ગ્રાન્ટેડ શાળાના તમામ કર્મચારીઓ તેમજ સંચાલકો કાળા વસ્ત્રો ધારણ કરી ફરજ બજાવશે. સંકલન સમીતીની પડતર માંગણીઓના અનુસંધાને બ્લેક સપ્તાહ ઉજવવાનું નકકી કરાયું છે. જો કે, આ દરમિયાન આવનારા 15 ઓગષ્ટના તહેવારને રાબેતા મુજબ ધામધૂમથી ઉજવવાનું પણ સંકલન સમીતી દ્વારા નકકી કરાયું છે. જયારે અન્ય કામગીરીનો બહિષ્કાર યથાવત રાખવાનો નિર્ણય પણ લેવાયો છે.