• વડોદરાની ઊર્મિ સ્કૂલના 45 વિદ્યાર્થીઓએ 12 કલાકની મહેનતથી 1225 ચોરસ મીટરની મહાકાય રંગોળી બનાવી મતદાન કરવાનો મેસેજ આપ્યો…

વડોદરા શહેરની ઊર્મિ સ્કૂલના 45 જેટલા છાત્રોએ 12 કલાક સુધી સતત મહેનત કરી બનાવેલી રંગોળીને કલેક્ટર અતુલ ગોર અને નિવાસી અધિક કલેક્ટર પ્રજાપતિએ નિહાળી હતી.

રંગોળી નિહાળી છાત્રોને બિરદાવ્યા

ગુજરાત વિધાનસભાની ચૂંટણીમાં મહત્તમ મતાદન માટે વડોદરા જિલ્લા ચૂંટણી તંત્ર દ્વારા આરંભવા આવેલું અવસર અભિયાન વેગવંતુ બનવાની સાથે વિવિધ શૈક્ષણિક સંસ્થાઓ પણ તેમાં સહભાગી બની રહી છે. આજે સમા વિસ્તારમાં આવેલા ઊર્મિ સ્કૂલ ખાતે વિશાળ રંગોળી દોરીને મતદાર જાગૃતિ માટે સંદેશો આપવામાં આવ્યો હતો. જિલ્લા ચૂંટણી અધિકારી અતુલ ગોર તથા અવસરના નોડલ અધિકારી ડો. બી. એસ. પ્રજાપતિએ આ રંગોળી નિહાળી છાત્રોને બિરદાવ્યા હતા.

1225 ચોરસ મીટરમાં આ રંગોળી બનાવી

ઊર્મિ સ્કૂલના 45 જેટલા છાત્રોએ 12 કલાક સુધી લાગલગાટ મહેનત કરી 35 બાય 35 ક્ષેત્રફળ એટલે કે 1225 ચોરસ મિટરમાં આ રંગોળી આલેખી હતી. જેમાં રૂ. 15 હજારના ખર્ચથી રેતીના રંગોનો ઉપયોગ કરવામાં આવ્યો છે. એથિકલ, એક્સીસીબલ, ઇન્ક્લુઝિવ અને સસ્ટેનબલ ચૂંટણીનો સંદેશો આપવામાં આવ્યો છે.

ચૂંટણીમાં ખાસ મતદાન કરે એ માટે સંકલ્પ લેવડાવ્યા

આ ઉપરાંત, શાળામાં અભ્યાસ કરતા તમામ છાત્રોને લોકશાહી શાસનતંત્રમાં ચૂંટણી અને મતદાનનું મહત્વ સમજાવવા ખાસ તાસ લેવામાં આવ્યા હતા. છાત્રોના વાલીઓ ગુજરાત વિધાનસભાની આ ચૂંટણીમાં ખાસ મતદાન કરે એ માટે સંકલ્પ લેવડાવવામાં આવ્યા હતા.પ્રવૃત્તિની જાણકારી પણ મેળવી વડોદરા જિલ્લા ચૂંટણી અધિકારી અતુલ ગોર તથા અવસરના નોડલ અધિકારી ડો. બી. એસ. પ્રજાપતિ આજે સવારે આ રંગોળી નિહાળવા પહોંચી ગયા હતા. જ્યાં તેમણે છાત્રોની મહેનત અને કલાને બિરદાવી હતી. આ બન્ને અધિકારીઓએ શાળાના આચાર્ય અને સંચાલકો પાસેની સિસ્ટેમેટિક વોટર્સ એજ્યુકેશન એન્ડ ઇલેક્ટરોલ પાર્ટીસિપેશન (સ્વીપ) અંતર્ગત કરવામાં આવેલી પ્રવૃત્તિની જાણકારી પણ મેળવી હતી.