• વાઘના મૃતદેહનું પોસ્ટમોર્ટમ કરાવ્યા બાદ દરેક સંભવિત એંગલથી મામલાની તપાસ કરવામાં આવી રહી છે

મધ્યપ્રદેશના પન્ના અભયારણ્યની અંદર એક વાઘનું શંકાસ્પદ સંજોગોમાં મોત થયું છે. વાઘનો મૃતદેહ ઝાડ પર લટકતો મળી આવ્યો હતો. કહેવામાં આવી રહ્યું છે કે વાઘ જાતે જ ઝાડ પર ફસાઈ ગયો અને તેનું મોત થઈ ગયું છે. જો કે આ વિસ્તારમાં શિકારીઓ સક્રિય હોવાના કારણે વાઘનો શિકાર થવાની પણ શક્યતાઓ વ્યક્ત કરવામાં આવી રહી છે. આ આશંકાને કારણે પન્ના અભયારણ્ય પ્રશાસનથી લઈને રાજ્ય સરકારમાં ખળભળાટ મચી ગયો છે. સરકારે ઉતાવળમાં આ મામલે તપાસના આદેશ આપ્યા છે.

દેશમાં વાઘને લઈને પહેલેથી જ હાઈ એલર્ટ છે. દેશના તમામ અભયારણ્યોમાં તેમની સુરક્ષા માટે વિશેષ જોગવાઈ કરવામાં આવી છે. આવી સ્થિતિમાં આ મામલો સામે આવ્યા બાદ ખળભળાટ મચી ગયો છે. સરકાર એક્શનમાં આવ્યા બાદ વન વિભાગે પણ આ મામલે તપાસ હાથ ધરી છે. STF ટાઈગર ટીમ અને વરિષ્ઠ અધિકારીઓ ઘટનાસ્થળે પહોંચી ગયા છે. વાઘના મૃતદેહનું પોસ્ટમોર્ટમ કરાવ્યા બાદ દરેક સંભવિત એંગલથી મામલાની તપાસ કરવામાં આવી રહી છે.

અઢી દાયકા પહેલા સુધી પન્ના વાઘ માટે અનુકૂળ અભયારણ્ય હતું પરંતુ કોઈ કારણસર 2009માં અહીંથી વાઘનો સંપૂર્ણ નાશ થઈ ગયો હતો. આવી સ્થિતિમાં ભારત સરકારે પન્નામાં વાઘોની દુનિયા ફરીથી વસાવવા માટે ટાઈગર રિલોકેશન પ્રોગ્રામ ચલાવ્યો હતો. જે બાદ ફરી એકવાર આ અભયારણ્યમાં વાઘની સંખ્યા વધીને 70થી વધુ થઈ ગઈ છે.

ઉત્તર વન વિભાગના પન્ના રેન્જ હેઠળના વિક્રમપુરના તિલગવા બીટમાં વાઘનો મૃતદેહ મળી આવ્યો છે. વિક્રમપુર નર્સરી પાસે આ વાઘણનો મૃતદેહ મળી આવતાં ખળભળાટ મચી ગયો છે. CCF છતરપુર સંજીવ ઝાએ કહ્યું કે, બે વર્ષના નર વાઘનું મોત ખૂબ જ ચિંતાનો વિષય છે. આ મામલો શિકાર સાથે સંબંધિત હોઈ શકે છે. આ કારણોસર વન વિભાગ પણ ગંભીર છે. પરંતુ મોટો સવાલ એ છે કે, વાઘ અહીં કેવી રીતે આવ્યો, અને તે લોખંડના મજબૂત વાયરમાં કેવી રીતે ફસાઇ ગયો.