Published by : Vanshika Gor

ખેડા જિલ્લા દૂધ ઉત્પાદક સંઘ અમૂલ ડેરીમાં આજે, 14 ફેબ્રુઆરીના રોજ ચેરમેન અને વાઈસ ચેરમેનની ચૂંટણી યોજઇ છે. જેને લઈ ચરોતર પંથકનું રાજકારણ ગરમાયુ છે. ત્યારે વિપુલ પટેલની ચેરમેન તરીકે અને કાંતિ સોઢા પરમારની વાઇસ ચેરમેન તરીકે વરણી કરવામાં આવી છે.

અત્યાર સુધી રામસિંહ પરમારનું એકચક્રી શાસન રહ્યું છે પંરતુ હાલ આણંદ કોંગ્રેસના પૂર્વ ધારાસભ્ય કાંતિભાઈ સોઢા પરમાર સહિત 5 કોંગ્રેસ સમર્થક આગેવાનો ભાજપમાં જોડાઈ જતા અમૂલમાં ભાજપની બહુમતી થઈ છે. આ અંતર્ગત ભાજપ પ્રદેશ નિરીક્ષક એમ.એસ.પટેલની હાજરીમાં આણંદ સર્કિટ હાઉસમાં બેઠક થઇ છે.

પાર્ટી મોવડીમંડળે અમૂલના ભાજપના તમામ ડિરેક્ટરોને બોલાવી ચેરમેન અને વાઈસ ચેરમેન માટે સેન્સ લેવાની પ્રક્રિયા પૂર્ણ કરી હતી. આજે પાર્ટી નક્કી કરે તે મેન્ડેટ સ્વીકારી ચેરમેન અને વાઈસ ચેરમેનની ચૂંટણીમાં મત આપવા જણાવાયું હોવાની માહિતી મળી રહી છે.મહત્ત્વનું છે કે, ચેરમેન અને વાઈસ ચેરમેનની ચૂંટણીમાં 12 ચૂંટાયેલા સભ્યો, એક વ્યક્તિગત શેર હોલ્ડર સભ્ય અને આણંદ જિલ્લા રજીસ્ટાર તેમજ અમૂલ ફેડરેશન પ્રતિનિધિના વોટ ગણી 15 વોટની સંખ્યા થાય છે. જેમાં ભાજપ પાસે 11 સભ્યોનું બહુમત છે. જ્યારે કોંગ્રેસ પાસે બે સભ્યો છે.