Published by : Rana Kajal

હૉકી વર્લ્ડકપના ક્વાર્ટર ફાઇનલમાં સીધા પ્રવેશ માટે ભારતે ગુરુવારે (19 જાન્યુઆરી) વેલ્સ સામે મોટી જીત નોંધાવવી પડશે. પુલ ડીમાં ભારત અને ઈંગ્લેન્ડના ચાર-ચાર પોઈન્ટ છે, પરંતુ વધુ ગોલ કરવાના કારણે ઈંગ્લેન્ડ ટોપ પર છે. આ સાથે ઈંગ્લેન્ડ પણ તેની છેલ્લી મેચમાં સ્પેન સામે જીત નોંધાવીને પુલ ડીમાં ટોચ પર રહેવાનો પ્રયાસ કરશે. આ મેચ સાંજે 7.00 વાગ્યાથી રમાશે.

ભારતે તેની પ્રથમ મેચમાં સ્પેનને 2-0થી હરાવ્યું હતું, જ્યારે બીજી મેચ ઇંગ્લેન્ડ સાથે ગોલ રહિત ડ્રો રહી હતી. ઇંગ્લેન્ડે તેની પ્રથમ મેચમાં વેલ્સ સામે 5-0થી વિજય નોંધાવ્યો હતો. ત્રીજા સ્થાને રહેલા સ્પેને વેલ્સને 5-1થી હરાવ્યું. આ પુલમાં છેલ્લા સ્થાને રહેલા વેલ્સને બાદ કરતાં ત્રણેય દેશો પોઈન્ટ ટેબલમાં ટોચના સ્થાને રહેવાના દાવેદાર છે. વર્લ્ડકપમાં રમી રહેલી 16 દેશોની ટીમોને 4-4ના પુલમાં વહેંચવામાં આવી છે. દરેક પુલની પ્રથમ ટીમને અંતિમ આઠની સીધી ટિકિટ મળશે. બાકીની ચાર ટીમો ક્રોસ ઓવર દ્વારા ક્વાર્ટર ફાઇનલમાં પહોંચશે.