ફેબ્રુઆરી-2023માં યોજાનારા મહિલા ટી-20 વર્લ્ડકપ માટે ભારતીય ટીમની જાહેરાત કરવામાં આવી છે. હરમનપ્રીત કૌરની આગેવાનીમાં ભારતીય ટીમ વર્લ્ડ ચેમ્પિયન બનવાના સ્વપ્નને પુરુ કરવા ઉતરશે. આ સાથે BCCIએ સાઉથ આફ્રિકામાં યોજાનાર ટ્રાઈ સિરિઝ માટે પણ ટીમની જાહેરાત કરી દીધી છે. મહિલા ટી-20 વર્લ્ડકપ-2023ની શરૂઆત 10મી ફેબ્રુઆરીથી થશે, જ્યારે 12 ફેબ્રુઆરીએ ભારતીય ટીમ પાકિસ્તાન સામે પ્રથમ મેચ રમશે. ભારતીય ટીમને ગ્રુપ-2માં રખાયું છે. ગ્રુપ-2માં ઈંગ્લેન્ડ, વેસ્ટઈન્ડિઝ, પાકિસ્તાન અને આયરલેન્ડ પણ છે. વર્લ્ડકપની ફાઈનલ મેચ 26 ફેબ્રુઆરીએ રમાશે.

ટી-20 વર્લ્ડકપમાં આ ખેલાડીઓ જોવા મળશે

મહિલા ટી-20 વર્લ્ડકપ-2023માં હરમનપ્રીત કૌર (સુકાની), સ્મૃતિ મંધાના (ઉપ-સુકાની), શેફાલી વર્મા, યાસ્તિકા ભાટિયા (વિકેટ કીપર), ઋચા ઘોષ, જેમિમા રોડ્રિગ્સ, હરલીન દેઓલ, દીપ્તિ શર્મા, દેવિકા વૈદ્ય, રાધા યાદવ, રેણુકા ઠાકુર, અંજલિ સરવાની, પૂજા વસ્ત્રાકર (ફિટનેસ પર નિર્ભર), રાજેશ્વરી ગાયકવાડ, શિખા પાંડેનો સમાવેશ કરાયો છે, જ્યારે એસ. મેઘના, સ્નેહ રાણા, મેઘના સિંહને રિઝર્વ પ્લેયર તરીકે રખાયા છે.