• પૂનમ પાંડે અને શર્લિન ચોપરા પણ હોટલોમાં અશ્લીલ ફિલ્મોના શૂટિંગના આરોપમાં સામેલ

મહારાષ્ટ્ર સાયબર સેલે નવી ચાર્જશીટમાં દાવો કર્યો છે કે કુન્દ્રાએ મુંબઈને અડીને આવેલી બે ફાઈવ સ્ટાર હોટલમાં અશ્લીલ ફિલ્મોનું શૂટિંગ કર્યું હતું. કુન્દ્રાએ આ ફિલ્મોને OTT પ્લેટફોર્મ પર વેચીને પણ મોટી કમાણી કરી હતી. સાયબર સેલે ગયા અઠવાડિયે જ કોર્ટમાં આ ચાર્જશીટ રજૂ કરી છે. આમાં મોડલ પૂનમ પાંડે, શર્લિન ચોપરા અને ફિલ્મ નિર્માતા મીતા ઝુનઝુનવાલા ઉપરાંત કેમેરામેન રાજુ દુબેનું નામ પણ સામેલ છે.

અત્રે ઉલ્લેખનીય છે કે પોર્નોગ્રાફી કેસમાં કુન્દ્રા મુંબઈના આર્થર જેલ રોડમાં 63 દિવસ સુધી બંધ હતા. બે મહિના જેલમાં રહ્યા બાદ તેને ગયા વર્ષે સપ્ટેમ્બરમાં જ સેશન્સ કોર્ટમાંથી જામીન મળ્યા હતા. સાયબર સેલે ગયા અઠવાડિયે શુક્રવારે 450 પાનાની ચાર્જશીટ રજૂ કરી છે. જેમાં બનાના પ્રાઇમ ઓટીટીના સુવાજીત ચૌધરી અને કુન્દ્રાના સ્ટાફ ઉમેશ કામથ પર ઓનલાઈન પ્લેટફોર્મ પર વેબ સિરીઝ ‘પ્રેમ પાગલાની’ અપલોડ કરવાનો આરોપ છે.

બીજી તરફ, પૂનમ પાંડે પર આરોપ છે કે તેણે પોતાની મોબાઈલ એપ ‘ધ પૂનમ પાંડે’ વિકસાવી હતી અને કુન્દ્રાની કંપની આર્મ્સપ્રાઈમ સાથે બિઝનેસ એગ્રીમેન્ટ કરીને વીડિયો શૂટ કર્યો હતો. આ વીડિયો ફરતા કરવામાં આ કંપનીની મદદ પણ લેવામાં આવી હતી. આ સિવાય કેમેરામેન રાજુ દુબે પર અભિનેત્રી શર્લિન ચોપરાનો વીડિયો શૂટ કરવાનો આરોપ છે. નિર્માતા મીતા ઝુનઝુનવાલા પર આ લોકોને મદદ કરવાનો અને પ્રેરિત કરવાનો આરોપ છે.