Published by : Anu Shukla

• તમામ પેન્શનરોને 15 માર્ચ સુધીમાં બાકી ચૂકવણી કરવાનો નિર્દેશ આપ્યો

વન રેન્ક વન પેન્શન કેસમાં સુપ્રીમ કોર્ટે કેન્દ્ર સરકારને સુરક્ષા દળોના તમામ પેન્શનરોને 15 માર્ચ સુધીમાં બાકી ચૂકવણી કરવાનો નિર્દેશ આપ્યો છે. સુપ્રીમ કોર્ટે એક્સ-સર્વિસમેન એસોસિએશનને એવી છૂટ પણ આપી છે કે જો તેઓ કેન્દ્ર સરકારની ચૂકવણીથી હજુ અસંતુષ્ટ હોય તો તેઓ ફરીથી સુપ્રીમ કોર્ટમાં અરજી કરી શકે છે. કોર્ટે કહ્યું છે કે, પાત્ર ધરાવતા લોકોને વન રેન્ક વન પેન્શનની ચૂકવણીનું કામ ઝડપી પૂર્ણ કરવામાં આવશે.

ચીફ જસ્ટિસ ડીવાય ચંદ્રચુડ અને જસ્ટિસ પીએસ નરસિમ્હાની બેંચે કેન્દ્રને નિર્દેશ આપ્યો છે કે તે સુનિશ્ચિત કરે કે, સુરક્ષા દળોના તમામ પેન્શનરોને તેમની બાકી રકમ ચૂકવવામાં આવે અને તેમાં વધુ વિલંબ ન થવો જોઈએ. એટર્ની જનરલ આર. વેંકટરામણી કેન્દ્ર સરકાર વતી કોર્ટમાં હાજર થયા અને કહ્યું કે, કંટ્રોલર જનરલ ઓફ ડિફેન્સ એકાઉન્ટ્સે ટેબ્યુલેશન પ્રક્રિયા પૂર્ણ કરી લીધી છે અને ટૂંક સમયમાં આ ટેબ્યુલેશનને મંજૂરી માટે સંરક્ષણ મંત્રાલયને મોકલવામાં આવશે. 15 માર્ચથી પેન્શનધારકોના ખાતામાં એરિયર્સ આવવાનું શરૂ થઈ જશે.

ગયા મહિને સરકારે વન રેન્ક વન પેન્શન હેઠળ પેન્શનધારકોની બાકી રકમની ચુકવણી માટે સમયમર્યાદા 15 માર્ચ, 2023 સુધી લંબાવવાની માંગ કરી હતી. આ બીજી વખત હતું જ્યારે સુપ્રીમ કોર્ટે કેન્દ્ર સરકારની માંગ પર બાકી ચૂકવણીની સમયમર્યાદા લંબાવી હતી. અગાઉ ગયા વર્ષે જૂનમાં પણ કેન્દ્ર સરકારે પેમેન્ટ માટે ત્રણ મહિનાનો સમય માંગ્યો હતો.