મધ્ય પ્રદેશના રિવાના સાંસદે હાથ વડે શાળાનું ટોઇલેટ સાફ કર્યું

• નરેન્દ્ર મોદીના જન્મ દિવસ નિમિત્તે યોજાયેલ વૃક્ષારોપણ કાર્યક્રમ દરમિયાન શાળાનું ટોઇલેટ ગંદુ દેખાતા સાંસદ જાતે જ સફાઈ કરવા લાગ્યા
• ટ્વિટર ઉપર વિડીયો શેર કર્યો

રીવા : મધ્યપ્રદેશના રીવાના ભાજપ સાંસદ જનાર્દન મિશ્રાએ એક શાળામાં હાથ વડે ટોઈલેટ સાફ કર્યું હતું જેના માટે તેઓ હાલ ચર્ચામાં છે. તેઓએ વૃક્ષારોપણ કાર્યક્રમ દરમિયાન ટોઇલેટ ગંદુ જોતાં જાતે જ સફાઈ અભિયાનમાં જોડાઈ ગયા હતા

આ ઘટના ગુરુવારે બની હતી, જ્યારે સાંસદ રીવાના ખટકરીમાં એક કન્યા શાળામાં પહોંચ્યા હતા. પીએમ નરેન્દ્ર મોદીના જન્મદિવસ નિમિત્તે સેવા પખવાડિયાનો પ્રસંગ હતો. શાળામાં વૃક્ષારોપણનો કાર્યક્રમ હતો, પરંતુ જનાર્દન મિશ્રાએ શાળાનું નિરીક્ષણ પણ કર્યું હતું. ટોઇલેટમાં ગયા ત્યારે ત્યાં ઘણી ગંદકી હતી. તેના પર સાંસદ પોતે સફાઈમાં લાગી ગયા. હદ તો ત્યારે થઈ ગઈ, જ્યારે સાંસદને ટોઈલેટ સાફ કરવા માટે બ્રશ અને ગ્લવ્ઝ પણ ન મળ્યા તો તેઓ હાથથી ટોઇલેટ સીટ સાફ કરવા લાગ્યા. જ્યારે સાંસદ આ કામ કરી રહ્યા હતા ત્યારે પટાવાળા શાળામાં હાજર હતા. ટોઈલેટ સાફ કર્યા બાદ જનાર્દન મિશ્રાએ પીએમ નરેન્દ્ર મોદી, બીજેપીના રાષ્ટ્રીય અધ્યક્ષ જેપી નડ્ડા, સીએમ શિવરાજ સિંહ ચૌહાણ, સાંસદ બીજેપી અધ્યક્ષ વીડી શર્મા અને હિતાનંદ શર્માને ટેગ કરતો એક વીડિયો ટ્વીટ કર્યો. અવારનવાર ચર્ચામાં રહેનારા રીવાના સાંસદ મોદી સમર્થક છે. સરપંચમાંથી સાંસદ બનેલા મિશ્રા અત્યારસુધીમાં 6 વખત શૌચાલયની સફાઈનો વીડિયો સોશિયલ મીડિયા પર શેર કરી ચૂક્યા છે, જેમાં તેમણે PMને પણ ટેગ કર્યા છે. ઘણી વખત કચરાનું કલેક્શન અને ઓફિસ ટેબલ સાફ કરતો વીડિયો શેર કરી ચૂક્યા છે.