લાહોર
એક માતા અને પુત્રી ભૂખના કારણે એટલા પરેશાન થઈ ગયા કે તેઓએ તેમના પેટપર ઈંટો બાંધી દીધી. મામલો પાકિસ્તાનના લાહોરનો છે. ગરીબીના કારણે માતા-પુત્રી દુ:ખી જીવન જીવવા મજબૂર છે. બંને પોતાની કિડની વેચવા પણ તૈયાર છે.
તાજેતરમાં જ પાકિસ્તાની યુટ્યુબર સૈયદ બાસિત અલીએ આ પરિવાર સાથે વાત કરી હતી. સૈયદ જ્યારે માતા-પુત્રી સાથે વાત કરતો હતો ત્યારે બંને ઘણી વાર રડી પડ્યા હતા. સૈયદે પરિવારની આર્થિક સ્થિતિ પણ બતાવી, ઘરમાં વાસણો ખાલી પડ્યા હતા. લોટનો ડબ્બો પણ ખાલી હતો. સૈયદે કહ્યું કે ખાવા માટે કંઈ નથી, આ કારણે મા-દીકરી બંનેએ પેટ પર ઈંટ બાંધી છે. તેણે પાડોશીઓ પાસેથી આ પરિવાર વિશે માહિતી મેળવી હતી. સૈયદ બાસિતને મહિલાએ જણાવ્યું હતું કે તે બીમાર છે, સફેદ મોતિયાથી પીડિત છે. દીકરીને નોકરી મળી પણ તે જ્યાં ગઈ ત્યાં લોકોએ તેને ખોટી નજરથી જોઈ. પછી મેં વિચાર્યું કે હું ભૂખ સહન કરીશ પણ કોઈ ખોટું કામ નહીં કરું. મહિલાએ જણાવ્યું કે દીકરીની સગાઈ થઈ ગઈ છે, પરંતુ લગ્ન કરવા માટે પૈસા નથી. માતા-પુત્રીએ કહ્યું કે તેઓ તેમની કિડની વેચવા પણ તૈયાર છે. જેથી કરીને અમે અમારા પરિવાર માટે થોડા પૈસાની વ્યવસ્થા કરી શકીએ. સૈયદ બાસિતે કહ્યું કે પરિવારે ત્રણ દિવસથી ખાધું નથી. મહિલાએ ઈંટ બાંધવાનું કારણ પણ જણાવ્યું, તેણે કહ્યું- ‘ભૂખ સહન થતી નથી, તેથી જ તેણે આ કર્યું છે આટલું કહેતાં તે સ્ત્રી રડી પડી અને કહ્યું કે દીકરો પણ નાનો છે, પણ તેને નોકરી નથી મળી રહી. ત્યાર પછી મહિલાએ કહ્યું કે જ્યારથી પાકિસ્તાનમાં નવી સરકાર સત્તામાં આવી છે ત્યારથી સ્થિતિ વણસી ગઈ છે. ઈમરાન ખાનની સરકારમાં પણ સ્થિતિ સારી હતી.
